Balade 213 : Vous qui avéz chaude complexion (CCXV)

Autre Balade

                        Vous qui avéz chaude complexion                                                      46b
                        Devéz hair et fuir vo contraire,
                        Or vous gardéz donc de la region
                        Ou les fruis sont perilleus a mal faire :
5                      Ce sont trufles proprement
                        Dont l’en y sert plus especiaument,
                        Et si est ce viande trop mal saine
                        Qu’elle destruit et donne mouvement
                        De pis avoir que d’acés de tierçaine.

10                    C’est racine d’orrible vision
                        Que l’en puet bien a foudre contrefaire :
                        Noire est dehors, mais sa decohection
                        Eschaufe trop, le goust en put et flaire.
                        Cellui qui premierement
15                    La desterra fut cause de tourment.
                        Par la bouche se met l’erbe villaine.
                        J’en ai mangié, dont mon las cuer se sent
                        De pis avoir que d’acés de tierçayne.

                        Ne je n’y voy nulle curacion
20                    Fors de fuir, car ou elle repaire
                        Vendra la mort a tribulacion,
                        Courroux de cuer, qui n’aura lectuaire
                        De primevoirre briefment.
                        Mais nul n’en veult user presentement.
25                    Je ment : si fait a la cour souveraine,
                        Ou pluseurs sont par ce fruit attendant
                        De pis avoir que d’acés de tierçayne.