Balade 212 : Nulz ne veult plus estre Dyogenés (CCXIV)

Autre Balade

                        Nulz ne veult plus estre Dyogenés
                        Qui surmonta l’avarice Alixandre.
                        Frans homs vesquit de convoitise néz,
                        N’onques vices ne cessa de reprandre.
5                      Il ne voult flater Denis.
                        Aristipus qui estoit ses amis
                        L’en reprenoit, disant qu’il estoit foulz :
                        ― Mais tu, dist il, es de ton sens desmis.
                        Voir dire vueil, laver et manger choulz[1].

10                    Car li bons homs estudioit adés
                        Qui a chascun vouloit son salut rendre.
                        En un tonnel fut toudis ses retrés,
                        Devers les vens faisoit le fons estendre
                        Pour eschiver leurs peris.
15                    Ses choulz lavoit aux ruisseaulx du pais,
                        Sa main lui fut vaisseaulx a boire et poz,
                        Et respondoit quant il en fut resprins :
                        ― Voir dire vueil, laver et manger choulz[2].

                        Aristipus fist autrement ses fais,
20                    Denis flata pour le hault estat prandre
                        Qui Roys estoit. Pluseurs se sont meffais
                        Et se meffont, qui bien y veult entendre,
                        Pour avoir les grans habis
                        Semblablement. Mais quant a moy je dis
25                    Dyogenés plus acquerir de los
                        D’Aristipus : pour ce, sachiéz aussis,
                        Voir dire vueil, laver et manger chouls.

[1] Ms. des choulz

[2] Ms. des choulz