Balade 211 : Or voy je bien qu’il n’est cuer de lyon (CCXIII)

Autre Balade

                        Or voy je bien qu’il n’est cuer de lyon
                        Ne de lieppart, d’autre beste sauvage,
                        N’omme si fort prins en religion
                        Que femme n’ait tost mis a son usaige.
5                      Par femme fut prins Salemon le saige,
                        Par femme fut deceu le premier homme,
                        Par femme fut dampné l’umain linage :
                        Il n’est chose que femme ne consomme[1].

                        Par femme fut mis a destruction
10                    Sanxes li fort, et Hercules en rage,
                        Ly roys Davis a redargucion,
                        Si fut Merlins soubz le tombel en caige,
                        Nul ne se puet garder de leur langaige.
                        Par femme fut en la corbaille a Romme
15                    Virgile mis, dont ot moult de hontaige :
                        Il n’est chose que femme ne consomme[2].

                        Maint homme ont fait briser s’entencion,
                        Que l’on tenoit de tresferme couraige,
                        Et delaissier toute devocion,
20                    L’un par amours, l’autre par mariage.
                        Car au jour d’ui un entre touz en sçay je,                                           46a
                        Que cuer devot plus qu’autre nul renomme,
                        Qui pour femme a laissié son hermitaige :
                        Il n’est chose que femme ne consomme. [3]

[1] Ms. consumme

[2] Ms. consumme

[3] Ms. consumme