Balade 210 : Si comme Roys porte par excellence (CCXII)

Balade

                        Si comme Roys porte par excellence
                        La courrone de sa grant dignité,
                        A [la] gloire et a la reverence
                        De sa tresdigne et roial majesté,
5                      Et que il doit par vertus
                        Plus resplendir et estre revestus
                        De bonnes meurs que nulle autre personne,
                        Ainsi doivent pour bons estre tenus
                        Ceuls qui portent l’ordre de la couronne.

10                    Car c’est signe de hauteur et puissance,
                        A .xii. fleurs de grant auctorité :
                        C’est assavoir : Foy, Vertu, Atrempance,
                        Amour de Dieu, Prudence et Verité.
                        Honeur est ses droiz escus
15                    Et Largesce resplendist par dessus,                                                   45d
                        Force et Pité tout le cercle avironne.
                        Charité tient et Loyauté met sus
                        Ceuls qui portent l’ordre de la couronne.

                        Ayent ces poins trestuit en remembrance
20                    Ceulx qui prannant l’ordre par amisté.
                        Car tele ordre requiert haulte vaillance
                        Et chevaliers de noble paranté.
                        Bien s’est li chiefs maintenus,
                        Car de hault lieu est attrais et venus,
25                    Conte, baron l’escu voirre le sonne,
                        Son cri crient : « la merveille » le plus,
                        Ceuls qui portent l’ordre de la couronne.