Balade 209 : Selon le Brut de l’isle des Geans (CCXI)

De la prophecie Merlin sur la destruction d’Angleterre qui doit brief advenir.

                        Selon le Brut de l’isle des Geans
                        Qui depuis fut Albions appelee,
                        Peuple maudit, tardis en Dieu creans,
                        Sera l’isle de tous poins desolee.
5                      Par leur orgueil vient la dure journee
                        Dont leur prophete Merlin
                        Prenostica leur dolereuse fin,
                        Quant il escripst : « Vie perdréz et terre,
                        Lors monstreront estrangier et voisin :
10                    Ou temps jadis estoit cy Angleterre. »

                        Las ! toy, terre gouvernee d’enfans !
                        Visaige d’ange portéz. Mais la pensee                                                45c
                        De Diable est en vous toudis sortissans,
                        A Lucifer par orgueil comparee.
15                    La lou par vous est ja.ii. foiz cassee.
                        Dont le service divin
                        Ne faictes pas d’aournemens enterin,
                        En demonstrant que foible est vostre serre.
                        Destruiz seréz, Grec diront et Latin :
20                    Ou temps jadis estoit ci Angleterre.

                        Sur le pais qui plus vous fut aidans,
                        La petite Bretaingne est surnommee,
                        Yert le debat de Gaule et de vous grans.
                        La doit ouvrer contre vous destinee,
25                    La commença la premiere meslee,
                        La finera le hutin.
                        Puis passeront Gauloys le bras marin,
                        Le povre anglet destruiront si par guerre,
                        Qu’adonc diront tuit passant ce chemin :
30                    Ou temps jadis estoit cy Angleterre.