Balade 206 : Tant de perilz sont a suir la court (CCVIII)

Autre Balade

De la maniere d’etre a la court

                        Tant de perilz sont a suir la court
                        Qu’a grant paine s’en pourroit nul garder.
                        Qui grace y a, Envie sur lui court,
                        Qui grans y est, en doubte est de verser.
5                      La convient il trop de maulx endurer
                        Dont, quant a moy, je tien que c’est grans sens
                        D’avoir a court un pié hors et l’autre ens.

                        Es grans cours fault souvent faire le sourt,
                        Qu’om ne voit rien et qu’on ne scet parler,
10                    Autrui blandir et qu’om saiche du hourt,
                        Faire plaisir, soufrir, dissimuler,
                        N’il n’est pas bon d’y toudis demourer.
                        Mais pour le mieulx je conseille et consens                                      45a
                        D’avoir a court un pié hors et l’autre enz.

15                    L’un pié dedenz, s’aucun meschief lui sourt,
                        Fait bon avoir pour grace demander,
                        L’autre dehors s’aucun mal y acourt,
                        Afin qu’on puist le peril eschiver.
                        Vivre du sien, et qu’on puist demouer
20                    En paix de cuer : autrement ne m’assens
                        D’avoir a court un pié hors et l’autre ens.