Balade 205 : Tuit li vaillant et prodoms de jadis (CCVII)

Balade

                        Tuit li vaillant et prodoms[1] de jadis,
                        Tuit ly present et toute creature,
                        Cesar, Hector, Alixandre et Davis,
                        Artus, Charles, Godefroy, moy, Nature,
5                      Josué et Machabee,
                        Et tout homme qui a haulte honneur bee
                        Devons de plours faire riviere et unde,                                              44d
                        Car par la mort est la terre troublee
                        Du plus vaillant qui fust en tout le monde.

10                    Comment sera ses nobles corps assis,
                        Ne qui fera se riche sepulture !
                        Entre les Dieux devroit estre ravis
                        Corporelment et en toute escripture
                        Soit sa prouesce louee
15                    Afin que tuit saichent sa renommee
                        Qui dessus touz en faiz d’armes habonde,
                        Tant que la mort soit en tous lieux ploiree
                        Du plus vaillant qui fust en tout le monde.

                        De trestous ceuls que je formay et fis
20                    Estoit la fleur et la droicte eslicture,
                        Qui en po d’ans a plus de faiz fenis[2]
                        Et qui mieulx a cerchié toute aventure,
                        Et par qui acheminee
                        Estoit d’armes la tresdouce contree,
25                    Qui pour sa mort en grant dolour redunde.
                        Las ! au jour d’ui est France desnuee
                        Du plus vaillant qui fust en tout le monde.

[1] Ms. li prodoms

[2] Ms. ferme