Ballade 204 : Estoc d’oneur et arbres de vaillance (CCVI)

Autre Balade

                        Estoc d’oneur et arbres de vaillance
                        Cuer de lyon esprins de hardement,
                        La flour des preux et la gloire de France,                                           44c
                        Victorieux et hardi combatant,
5                      Saige en voz fais et bien entreprenant,
                        Souverain homme de guerre,
                        Vainqueur de gens et conquereur de terre,
                        Le plus vaillant qui onques fust en vie,
                        Chascun pour vous doit noir vestir et querre :
10                    Plouréz, plouréz flour de chevalerie.

                        O Bretaigne, ploure ton esperance,
                        Normandie, fay son entierement,
                        Guyenne aussi, et Auvergne or t’avence,
                        Et Languedoc, quier lui son mouvement.
15                    Picardie, Champaigne et Occident
                        Doivent pour plourer acquerre
                        Tragediens, Arethusa requerre
                        Qui en eaue fut par plour convertie,
                        Afin qu’a touz de sa mort les cuers serre :
20                    Plouréz, plouréz fleur de chevalerie.

                        Hé ! gens d’armes, aiéz en remembrance
                        Vostre pere, vous estiéz si enfant.
                        Le bon Bertran, qui tant ot de puissance,
                        Qui vous amoit si amoureusement.
25                    Guesclin crioit. Priéz devotement
                        Qu’il puist paradis conquerre.
                        Qui dueil n’en fait et qui ne prie il erre,
                        Car du monde est la lumiere faillie :
                        De tout honeur estoit la droicte serre :
30                    Plouréz, plouréz flour de chevalerie.