Balade 203 : Li envieux n’a joie ne repos (CCV)

Autre Balade

                        Li envieux n’a joie ne repos
                        Fors que dolour, tristour, merancolie,
                        Qui le destruit et seiche ses os,
                        Car un seul jour n’ara ja chiere lie,
5                      Tousjours mesdit d’autrui par sa folie,
                        Et d’autrui bien est tous temps dolereux
                        Qui ne lui nuist ne ne proufite mie :
                        Maudit de Dieu soit telz chiens convoiteux.

                        Car comparer le puis a mon propos
10                    Du chien qui est figuréz par envie
                        Que s’il avoit de char cuite cent pos[1]
                        Et fust saoul, s’autre chien voit, il crie,
                        Souffrir ne veult qu’il en ait crote ou mie,
                        Mais se combat et hule comme un leux.
15                    Asséz de gens tiennent ceste partie :
                        Maudit de Dieu soit tel chien convoiteux.

                        Car pluseurs ont leurs greniers plains et clos
                        Et trop de biens en ceste mortel[2] vie
                        Et qui sur tous veulent avoir les los,
20                    Autrui blasmer et faire leur maistrie.
                        Et leur desplaist trop s’aucun multiplie,
                        Et ne leur chaut des povres soufraiteux,
                        Mais ilz mourront, pour ce fault que je die :
                        Maudit de Dieu soit tel chien convoiteux.

[1] Ms. pois

[2] Ms. mortele