Balade 201 : Cellui qui veult maison edifier (CCIII)

Autre Balade

                        Cellui qui veult maison edifier
                        Ne le doit pas faire en entencion
                        Que son voisin lui doye argent bailler,
                        Car ce seroit folle provision.
5                      Ne cellui n’est pas saichant
                        Qui au disner d’autrui homme s’attant,
                        Car il faudroit souvent a son entente :
                        On ne tient pas toudis ce qu’en convente[1].

                        L’en ne se doit en paroles fier,
10                    Car trop y a de variacion.
                        Par moy l’ay peu mieulx que nul essaier,                                           44a
                        Car l’en m’a fait mainte promission
                        Qui se passoit comme vent,
                        Sanz estre abbé et sanz tenir convent,
15                    Dont desert suis, si puis dire et me vente :
                        On ne tient pas toudis ce qu’en convente[2].

                        Promesse m’a Folour fait commencer
                        Et de mes biens faire vendicion,
                        Si se fait bon sur ces poins aviser,
20                    Il n’y a tel com la possession.
                        Le croire legierement
                        Fait decepvoir et perdre mainte gent.
                        A paroles jamais nul ne s’assente :
                        On ne tient pas toudis ce qu’on convente[3].

[1] Ms. convence

[2] Ms. convence

[3] Ms. convence