Balade 200 : Quant Alixandre sa quest commença (CCII)

Autre Balade

                        Quant Alixandre sa quest commença
                        Avoir pouoit entre.xii. ou.xv. ans,
                        Qui toutes terres soubmist et conquesta
                        Et qui ala si jeusnes par les champs
5                      Que chascuns le redoubtoit,                                                                43d
                        Les chevaliers anciens honouroit,
                        Par leur conseil voult ouvrer et aprandre,
                        Les bons ama et toudis leur donnoit :
                        Le monde ainsi conquist jeune Alixandre.

10                    .xxxii. ans ot quant il desvia
                        Qui de touz Roys fut adonc li plus grans,
                        Et en oiseuse son temps ne dispensa
                        Mais fut hardiz [et] preux et combatans.
                        Ses ennemis requeroit,
15                    Et pour son bien un chascun le suioit,
                        Car faiz d’armes gist a bien entreprandre.
                        Chascun est bon quant son droit seigneur voit :
                        Le monde ainsi conquist jeune Alixandre.

                        Et saint Loys quant en France regna
20                    .xiiii. ans ot de gouverner engrans,
                        Tant qu’en Poitou un chastel assiega
                        Que il[1] conquist, et des lors fut regnans.
                        Ainsi faire le devroit
                        Ly jeusnes Roys, si conseil en avoit,
25                    Charles, qui puet bien son pais defendre,
                        Car en tel cas tout homme le suiroit :
                        Le monde ainsi conquist jeune Alixandre.

[1] Ms. Quil