Balade 199 : Cilz qui s’attent au blef de son voisin (CCI)

Autre Balade

                        Cilz qui s’attent au blef de son voisin
                        Et au mangier d’une estrange personne,
                        Et qui se veult vivre de l’autrui vin
                        Et qui rien n’a et cuide qu’om lui donne,
5                      Et sur autrui edifice maisonne
                        Pert ce qu’il fait et se travaille en vain.
                        Se povres n’est, povreté le sermonne,
                        S’il ne l’est hui qu’il le sera demain.

                        Il fault panser et regarder la fin,
10                    Et que chascun pour sa vie maçonne
                        Et qu’om se soit d’oiseuse trop afin.
                        Car qui oiseus sanz labour s’abandonne
                        Povre se voit, et quant il pluet ou tonne
                        Se recept n’a, bien doit gesir a plain.
15                    Chascuns meschant de lui dit et raisonne,
                        S’il ne l’est hui, qu’il le sera demain.

                        Or faisons donc com saige pelerin :
                        Soyons garni, faisons du moien bonne.
                        Ayons du blef pour porter au moulin
20                    Et un recept et du vin en la tonne,
                        Des pois, du lart. qui maisnage y foisonne
                        Sanz peril vit et se tient au certain,
                        Se[1] autrement fait, chetis sera tout homme,
                        S’il ne l’est hui, il le sera demain.

[1] Saint Hilaire corrige en s’