Balade 196 : Dieux nous donna petit terme de vie (CXCVIII)

Autre Balade

                        Dieux nous donna petit terme de vie
                        Et nous vivons en mourant chascun jour,
                        Par accidens, selon phillosophie,
                        Par trop repos, par petit de sejour,
5                      Par trop mangier, par trop paine et labour,
                        Par trop veillier, par[1] trop dormir le main,
                        Par boire trop, par delis de douçour :
                        Il n’est homme qui ait point de demain.

                        L’un est tué par aguet et envie,
10                    L’autre en guerre, l’autre muert par rumour,
                        L’un muert par feu, l’autre muert par navie,
                        Et l’autre chiet de planchier ou de tour.
                        L’un est pandu, quant il est malfaictour,
                        Et l’autre pert le chief par cas soudain.                                              43a
15                    En ce monde n’a que paine et tristour.
                        Il n’est homme qui ait point de demain.

                        Au mieulx durer, homs durer n’y puet mie
                        Que .lx. ans, oultre n’a nul retour,
                        Adonc languist en la greigneur partie
20                    Et ne pense point a son creatour,
                        Ne que mourir doye, c’est grant folour,
                        Car de la mort est chascun vray certain,
                        Mais de l’eure ne scet nul le retour :
                        Il n’est homme qui ait point de demain.

                        L’envoy

25                    Prince, prions a la Vierge Marie
                        Qu’elle nous doint son filz, le souverain,
                        Craindre et amer, ou nostre ame est perie :
                        Il n’est homme qui ait point de demain.

[1] Ms. et par