Balade 195 : Un recepveur compte chascune annee (CXCVII)

Autre Balade

                        Un recepveur compte chascune annee
                        Et du compte prant sa conclusion
                        Que sa terre ne soit executee,
                        Ses heritiers mis a perdicion,
5                      En doubte vit s’il n’a audicion
                        De ses comptes en mise et en recepte,
                        Si fait chascun, selon m’oppinion :
                        Qui ne paiera, il sera mis en debte.

                        Par receveur est bien interpretee
10                    Creature qui a discrecion,                                                                    42d
                        Qui des biens Dieu fait toudis sa levee
                        Et d’en compter n’a point d’entencion,
                        Dont s’ame pert par execucion
                        Souventefoiz la grant gloire parfette
15                    Du regne Dieu en la finicion :
                        Qui ne paiera, il sera mis en debte.

                        [A]dvisons nous, comptons sanz demouree
                        De noz pechiéz l’abhominacion,
                        Des biens de Dieu, de la grace donnee,
20                    Du temps perdu a no destruction.
                        Le temps s’en va. Se par confession
                        Et repentir n’est fin de compte faitte
                        De cuer contrict par satisfacion,
                        Qui ne paiera, il sera mis en debte.

                        L’envoy

25                    Prince, toudis est la mort aprestee,
                        Chambre d’enfer qui noz comptes aguette.
                        Comptons a Dieu, soit nostre ame acquittee :
                        Qui ne paiera, il sera mis en debte.