Balade 194 : Vous qui avéz pour vivre seulement (CXCVI)

Autre Balade

                        Vous qui avéz pour vivre seulement
                        Et pour vestir, ne veuilléz abregier
                        Vostre vie par servir longuement
                        Pour acquerir, car par trop convoitier
5                      En tous estas n’en est pas d’un millier                                               42c
                        Un trestout seul qui tende a monter hault
                        Qu’om ne voie languir ou perillier :
                        Pour ce dit on : « quant avoir vient, corps fault ».

                        Qu’a en armes chevalier de tourment,
10                    Ainçois qu’il puist a grant fait adrecier,
                        Clers de labour, ouvrier de froissement,
                        Bourgois, marchant, chascun en leur mestier,
                        Ly prestre aussi, advocat, usurier !
                        Leur grant travail en la fin po leur vault,
15                    Malades sont quant ilz deussent mangier,
                        Pour ce dit on : « quant avoir vient, corps fault ».

                        Lors quant acquis ont tant, soudainement
                        Viellesce vient leur vie menacier
                        Par leurs travaulx, se Salemon ne ment,
20                    Tant que leurs biens ne les puelent aidier.
                        Jonesce lors ne font que souhaidier.
                        Des granz acquetz par eulx faiz ne leur chault,
                        En languissant va leur biere au moustier,
                        Pour ce dit on : « quant avoir vient, corps fault ».

                        L’envoy

25                    Prince, qui a des son commencement
                        Vivre et vestir, soit liéz, joieux et baut.
                        Qui trop convoite, il vit dolentement :
                        Pour ce dit on : « quant avoir vient, corps fault ».