Balade 193 : Quant plus vient le temps avant (CXCV)

Balade

                        Quant plus vient le temps avant                                                         42b
                        Et plus voy dueil et tristesce,
                        L’un derrier, l’autre devant,
                        L’un tout seul, et l’autre en presse,
5                      L’un happe, l’autre delesse,
                        L’un s’en fuit, l’autre demeure,
                        Et que vault tel richesse ?
                        Tout est perdu en une heure.

                        L’un a son estat s’attant,
10                    Le fort au foible se dresse,
                        Le pere contre l’enfant,
                        Le mainsné a la mainnesse,
                        Toute raison se delesse,
                        Ly uns rit, ly autres pleure.
15                    Qui puet, si vive en leesse :
                        Tout est perdu en une heure.

                        Fy de tel avoir puant
                        Qui reboute gentillesse
                        Et fait chetif l’acquerant
20                    Et qui engendre paresse !
                        Fuiéz la, cuers de noblesse
                        Souffisance a vous acqueure :
                        C’est des vertus la maistresse.
                        Tout est perdu en une heure.