Balade 192 : Selon le dit de Salemon le saige (CXCIV)
Autre Balade
Selon le dit de Salemon le saige 42a
Qui touz passa en richesce[1] et en sens,
Ly premiers fut qui fontaine en usaige
Fist par conduiz et enclos[is]t dedenz
5 Pierres de maulx esperis respondens
Aux demandes par conjuracion,
Ou [le] temps d’edificacion
Fist le plus grant dont il puist souvenir.
Au[2] monde n’a homs en conclusion
10 Fors faire bien et de soy esjouir.
Il fist les parcs et enclost le boscaige
De tresgrans murs. Grant nombre ot de sergens.
Estancs fist beaux et maint subtil ouvraige
Edifia. Craims fut de toute gens.
15 Aumailles ot et tropiaulx de jumens
Or et argent sur toute nascion,
Joyaulx, vaisseaulx et delectacion
Et de touz fruis pour prandre son plaisir.
Mais tout n’est iren, c’est son opinion,
20 Fors faire bien et de soy esjouir.
Car joie avoir fait jeusne viel pelaige,
Et nul ne puet passer l’aage et le temps.
Tristesce avoir part viel jeusne visaige
Et deseichier quant est trop acquerans.
25 Contre raison est lors sa mort querans
Et le destruit male acquisicion.
Le faire bien est la salvacion
De nostre ame que chascun doit querrir[3].
Au monde n’a vraie possession
30 Fors faire bien et de soy esjouir.
L’envoy
Prince, il n’est riens qui vaille lié courage[4]
Et faire bien, ce vueilléz retenir,
Possession, richesce n’eritaige,
Fors faire bien et de soy esjour.
[1] Ms. richesces
[2] Ms. Qu’au
[3] Ms. querre
[4] Saint Hilaire corrige en couraige
