Balade 191 : Mes richesces muent en povreté (CXCIII)

Autre Balade

                        Mes richesces muent en povreté
                        Et mes joies sont tournees en plour,
                        Et mes delis sont en adversité
                        Mon[1] bien en mal, mon repos en labour,
5                      Mon grant renom se change en deshonour,
                        Je periray puis que Dieux se recorde
                        De mon orgueil : estainte est ma luour,
                        Se Pitié n’est, Grace et Misericorde.

                        Plus ne seray telle com j’ay esté,
10                    Trop ay mesprins contre mon droit seignour,
                        Crime commis de lese magesté
                        Qui estoye chief du regne et la flour.
                        Et par mon fait ont esté en errour
                        Autres que moy. Lasse ! J’ay quis la corde,
15                    Dont serve sui jusqu’au derrenier jour,
                        Se Pitié n’est, Grace et Misericorde.

                        En moy se doit mirer toute cité
                        Et eschiver du prince la rigour,
                        Orgueil laissier, vivre en humilité,
20                    Par obeir acquerir son amour
                        Sanz eslever ne commencer rumour,
                        Car qui le fait en la fin chiet sanz orde.
                        Mercy requier, mortesui sanz retour
                        Se pitié n’est, Grace et Misericorde.

[1] Ms. Et mon