Balade 189 : Depuis c’uns homs a passé cinquante ans (CXCI)

Balade

Comment un homme ne se doit armer puis qu’il a passé cinquante ans

                        Depuis c’uns homs a passé cinquante ans,
                        Sanz lui armer se tiengne en sa maison,
                        S’il a de quoy, ne se voist plus par les champs.
                        De reposer doit querir la saison,
5                      Vivre du sien et user par raison
                        Des biens acquis loyaument, et non prandre                                     41c
                        Les biens d’autrui, car c’est grant desraison :
                        Bonne vie fait a bonne fin tendre.

                        Ce temps passé, devient chanuz et blans
10                    Par viellesce homs, s’a mainte passïon,
                        Doleur de chief, froidure, goute es flans.
                        De s’ame doit avoir compassïon,
                        Penser a Dieu, querir remissïon
                        De ses pechiéz, a son salut entendre,
15                    Non pas tolir autrui possessïon :
                        Bonne vie fait a bonne fin tendre.

                        Qui autrement le fait, il est meschant,
                        Son corps destruit, l’ame a dampnacïon
                        Met, puis qu’il est d’autrui biens ravissans
20                    Et qu’il n’en fait nulle solucïon.
                        Mieulx lui vausist en s’abitacïon
                        Mangier des pois ou aucun art aprandre
                        Que soy user en tel confusïon :
                        Bonne vie fait a bonne fin tendre.