Balade 188 : Qui aroit bien Bouece visité (CXC)

Balade

                        Qui aroit bien Bouece visité
                        Et qu’ilz est homs noble d’ame et de corps,
                        Ces mondains biens tenrroit en grant vilté
                        Qui reluisent un petit par dehors.
5                      Car d’eulx mesmes, que valent les tresors
                        Fors d’esmouvoir a douleur et apaine
                        Les amasseurs qui en languissent lors ?
                        En ce monde n’a richesce certaine.

                        Deniers avoir, or, joyaulx a plenté
10                    Aux convoiteus muevent souvent descors.
                        Hais en sont, et li donneur amé.
                        Les retenir n’approprier est tors.
                        Largesce rent les donneurs bons et fors,
                        Seurs et hardiz, et Convoitise maine
15                    Les amasseurs mourir d’ameres mors :
                        En ce monde n’a richesce certaine.

                        Pourquoy ont ilz, c’est grant iniquité,
                        Leurs cuers soumis a ces biens vilz et ors,
                        Subgiéz a eulx, perdans leur dignité,
20                    Qui de chascun sont en pou d’eure estors ?
                        Homs vertueus soit de telz biens descors,
                        En poursuiant Beneurté souveraine.
                        Souffise lui. Soit de s’ame recors :
                        En ce monde n’a richesce certaine.