Balade 187 : Chascun blasme tousjours le temps present (CLXXXIX)

Autre Balade

                        Chascun blasme tousjours le temps present,
                        Et prise mieulx l’ancien de jadis
                        Ou il avoit, ce dient, meilleur gent.
                        Mais il est vray qu’il a esté toudis
5                      De bonnes gens, de mauvais [et] faintis,
                        Et est encor, fut toudis et sera
                        De maleureux, d’eureux et de chetis,
                        Ne jamés jour la regle ne faurra.

                        Cayn, Abel furent d’Adam enfant,
10                    Deux seulz freres : l’un fut de l’autre occis.
                        Joseph vendus, c’est du viel Testament,
                        Des lors furent les freres ennemis.
                        Moises Aron si furent bons amis :
                        Se l’un se fait, l’autre se deffera.
15                    L’un est améz, li autres est hais,
                        Ne jamais jour la regle ne faurra.

                        Pluseurs se sont portéz mauvaisement
                        Ou temps [passé], com Noiron li despis,
                        Et Ganelon qui trait faussement
20                    Les .xii. pers en Roncevaulx : aussis
                        Les uns vivent, les autres sont murdris.
                        L’un enrrichist et l’autre apovrira :                                                      41b
                        C’es tout secle, l’un a bien l’autre pis,
                        Ne jamés jour la regle ne faurra.