Balade 186 : Quant verray je le temps Octovien (CLXXXVIII)

Autre Balade

                        Quant verray je le temps Octovien,
                        Que toute paix fut au monde affermee ?
                        Quant verray je faire le commun bien,
                        Comme Cathons en ot la renommee ?
5                      Quant verray je povreté estre amee,
                        Comme jadis l’ama Dyogenés ?
                        Quant verray je Verité eslevee ?
                        Certes, je croy, ce ne sera jamés.

                        Quant verray je Justice en droit lien
10                    Sanz faindre a nul pugnir par juste espee ?
                        Quant verray je chascun vray chrestien
                        Com Pierres fut ? Quant yert la Loy gardee ?
                        Foy, Charité, ou estes vous alee ?                                                        41a
                        Tout se destruit par pechiéz et meffés.
15                    Quant verray je bon temps et bonne annee ?
                        Certes, je croy, ce ne sera jamés.

                        L’un sur l’autre a condicion de chien,
                        Pour ce nous est la guerre destinee,
                        Terre sans fruit, car nous ne valons rien,
20                    Mort et langour, paour desordonnee
                        Et l’un païs pugnist l’autre contree,
                        Tant que par fin seront briefment deffés.
                        Crions merci, soit no vie amendee.
                        Certes, je croy, ce ne sera jamés.