Balade 185 : Habondanment a de tous bien plenté (CLXXXVII)

Autre Balade

                        Habondanment a de tous bien plenté
                        Qui trois poins tient : l’un[1] a nom Suffisance,
                        Le secont Sens et le tiers est Santé.                                                   40d
                        Mais sanz ces trois vit en desordonnance
5                      Hons, quel qu’il soit, en langour, en meschance,
                        Vil, soufraiteus, povres et indigens,
                        Tant ait d’amis, de renom, de finance :
                        Souffise vous d’avoir Santé et Sens.

                        Telz est d’avoir et en hault lieu planté
10                    Qui convoiteus est plain d’insoufisance.
                        Lors ne lui vault chose qu’il ait anté :
                        Riches, povres vit en trop grant soufrance.
                        Li sos n’a rien puis que sens ne l’avance,
                        Vrais povres est, malades en tous temps,
15                    Sanz bien avoir fors doleur et grevance :
                        Souffise vous d’avoir Santé et Sens.

                        Car par ces .iii. sont tuit bien augmenté
                        D’ame et de corps. Par Sens on a chevance,
                        On aime Dieu, on fait sa voulenté.
20                    Cui il soufist, en Dieu vit par plaisance.
                        Qui a Santé, il regne en grant puissance.
                        Penséz, dictes, faictes bien, je m’assens
                        Que saufs seréz. Tenéz ceste ordonnance,
                        Souffise vous d’avoir Santé et Sens.

[1] Ms. dont l’un