Balade 179 : En Boece, de consolacion (CLXXXI)

Balade

                        En Boece, de consolacion
                        Trouveréz vous de Fortune l’assault,
                        Ses blandices et sa decepcion,
                        S’inconstance, muer de bas en hault
5                      Les soufraiteus. Aux riches ses biens tault,
                        Sa nature est toudis d’estre muable,
                        De grans moens ne petiz ne li chault,
                        En tous temps est Fortune decepvable.

                        Elle a de droit en sa possession
10                    Richesce, honeurs, dignitéz ne lui fault
                        Et puissances, dont revolucion
                        Se fait par lui : l’un nuist, a l’autre vault,
                        Puis se retrait et ces .iiii. retault,
                        Quant il lui plaist, ne n’a nul agreable,
15                    Mais qui la croit estre chetif le fault,
                        En tous temps est Fortune decevable.

                        Et puisqu’ainsi fait sa mutacion
                        Soudainement la deesse, en sursault,
                        Ses oeulx bandéz, sa roe en mocion
20                    Tournant toudis, dont tout le monde assault,
                        Despitéz la, aiéz cuer de vassault,
                        Ja ne croiéz qu’elle soit veritable,
                        Fuiéz ses biens, car se Dieux me consault,
                        En tous temps est Fortune decevable.