Balade 178 : Reue en paon et parole de gay (CLXXX)

Autre Balade

                        Reue en paon et parole de gay,
                        Cuer de lievre mis en corps de lion,
                        Gueule a serpent, sejour de papegay,
                        Chievre gratant, de chien condicion,
5                      Ce me disoit en une advision
                        Un prophete qui se nommoit Danis,
                        Tu perdras tout, terre et possession,
                        Lasches, cours, recreans et faillis.

                        Ces mos finéz, un autre entendy ay
10                    Qui m’appelloit filz de perdicion :
                        Porc vil et ort, certes je t’occiray,
                        Soubz toy sera la grant destuction,
                        Le sceptre fault de ta cognacion,
                        Par tes pechiéz l’arout tes ennemis,
15                    Jheremie t’en fait ostencion.
                        Lasches, couars, recreans et faillis.

                        Mais pour tes maulx enfant roy te donrray,
                        Vé ! terre, a toy ! car grant division
                        En tes princes et ou peuple mettray,
20                    De toy feray la transmigracion,                                                            39c
                        Car en toy n’a que variacion,
                        Envie, orgeuil, convoitise et mesdis,
                        Sanz craindre Dieu, sanz bonne affection,
                        Lasches, couars, recreans et faillis.