Balade 180 : Quant le grant lac dont sourt la frommiere (CLXXXII)

Autre Balade

                        Quant le grant lac dont sourt la frommiere
                        Commencera a mouvoir ses frommis,
                        Et qu’ilz prandront une estrange banniere
                        Et qu’ilz seront l’un a l’autre ennemis
5                      Tant que leurs lieux principaulx yert desmis,                                    39d
                        Adonc venrra la grant destruction
                        Dont autres qu’eulx seront mors et malmis
                        Par l’emprinse de leur commottion.

                        Et lors ystra Bruthus de sa riviere
10                    Qui se faindra de ce lac estre amis,
                        Et li lions sauldra de sa bruiere
                        Qui vers Brutus se sera contremis,
                        Et esmouvra par ses horribles cris
                        Des grans fourests de Gaule et d’Albion,
15                    Loups, cerfs, sangliers, tors, vaches et brebis,
                        Par l’emprinse de leur commottion.

                        La sera grant celle assemblee et fiere,
                        Et feront la bestes de mains pais
                        Bataille entr’eulx, mais la rumour premiere
20                    Sanz ferme paix y demourra toudis,
                        Jusques atant que Bruthus desconfis
                        Et ceulx du lac n’aront possession.
                        Mais trop nuiront l’aigle et les oiseaulx gris
                        Par l’emprise de leur commottion.