Balade 175 : Ilz sont a court deux gens equipolé (CLXXVII)

Autre Balade

                        Ilz sont a court deux gens equipolé                                                    38d
                        L’un a fourmi et l’autre a ceraseron.
                        Li froumi fait pourveance de blé
                        Pour son yver ou temps de la moisson :
5                      Il vit espargnablement,
                        Et se gouverne en tous cas saigement.
                        Le temps futur a en sa remembrance,
                        Tant que nul jour ne sera indigent :
                        Qui saiges est face ainsi pourveance.

10                    Le ceraseron par le temps de l’esté
                        Ne fera ja nulle provision.
                        Il vit aux champs, et quant s’est aosté,
                        Il se retrait en aucune maison,
                        Et au four communement
15                    Et es foyers chante doubteusement,
                        A grant dangier quiert illec sa substance.
                        Mais li fourmi se pourvoit cautement :
                        Qui saiges est face ainsi pourveance.

                        Ceuls qui long temps ont a court demouré,
20                    Qui sont pourveu, compere au fremion,
                        Car en servent se sont remuneré
                        Et ont acquis rente ou possession.
                        Mais li simple et ignorant
                        Sont craseron fameilleus, negligent,
25                    Qui ont chanté et mis en oubliance
                        Le temps doubteus. Le fourmi les reprant :
                        Qui saiges est face ainsi pourveance.