Balade 174 : Dont peut venir le temps si dolereus (CLXXVI)

Balade

                        Dont peut venir le temps si dolereus
                        Que pluseurs n’ont fort tristesce et ennuy,
                        Et sont pensis et merancolieus,
                        Si c’om ne voit faire joie a nullui ?
5                      Et qui plus est, dont trop esbahis sui,
                        Le monde[s] est ainsi partout menéz
                        Que pluseurs sont au jour d’ui enruméz.

                        Vient il du temps, ou se cause en sont ceulx
                        Qui le mal ont ? Oïl, si com je croy.
10                    Mal gouverner en a fait maint tousseus
                        Plus que le temps, de pieça l’apperçoi.
                        Mieulx vault son corps gouverner[1] que l’autrui,
                        D’or[2] en avant bien garde vous prenéz
                        Que pluseurs sont au jour d’ui enruméz.

15                    Et avec ce li temps est perilleus,
                        Qui se change mainte fois d’or a hui.
                        Pour ce ne puet aucun estre joieus
                        Ne remede certain trouver en lui,
                        Chascun se plaint, il[3] aussi com cellui
20                    Qui voit partout, comme desconfortéz,
                        Que pluseurs sont au jour d’ui enruméz.

[1] Ms. gouverner son corps

[2] Ms. D’ores

[3] Ms. et il