Balade 171 : De trois choses nous veuille Dieux garder (CLXXIII)

Autre Balade

                        De trois choses nous veuille Dieux garder
                        Et tous les bons en ceste mortel vie :
                        La premiere est de peuple reveler,
                        Qui tout destruit en sa forsenerie.
5                      Et de seignour qui a grant seignourie,
                        De sa fureur, pour sa hastiveté.
                        Et de la mort qui soudaine s’escrie.
                        Car en ces trois n’a raison ne pité.                                                      38a

                        L’en ne porroit peuple esmeu retarder
10                    Qu’il n’ait avant sa folour assevie.
                        Je le puis bien en pluseurs lieux prouver,
                        Par Beauvoisin, Flandres et Lombardie,
                        Et par Paris en la greigneur partie,
                        Et par autres qui se sont revelé.
15                    Donc qui ces poins fuit, ce n’est pas folie,
                        Car en ces trois n’a raison ne pité.

                        Ire en seigneur fait moult a redoubter,
                        On le scet bien a Milan, a Pavie.
                        Ne fist Noiron Seneque a mort livrer
20                    Hastivement et par Mauvaise envie ?
                        Si font pluseurs, que droiz n’est que je die,
                        Soudaine mort en a maint craventé.
                        Bon eschiver fait telle comparignie,
                        Car en ces trois n’a raison ne pité.