Balade 172 : Guettier de nuit, par jour a la barriere (CLXXIV)e
Balade
Guettier de nuit, par jour a la barriere,
Garlander tours et faire arrier fosséz,
Soudaulx avoir arrier[1], guet par derriere,
Estre tous jours de haubergon arméz,
5 Faire escoutes qu’om ne soit escheléz,
Savoir le cri de la nuit au certain,
Arbalestiers avoir et[2] cappitain
A convenu et souvent guerroier
Jusques a cy : or fault, si com je tain,
10 Chacier, voler, jouster et tournoier.
Soufert avons ou temps ça en arriere
Guerre et tourmens dont trop sommes fouléz,
Guez de chasteaulx, mainte parole fiere
Des ennemis, gens tuéz, raençonnéz.
15 Le plat païs a esté tel menéz
Que l’un estoit Genevoys, l’autre Yrain,
Si que prodoms n’osoit logier a plain : 38b
Or nous veult Dieux le bon temps envoier.
Se paix avons, il faut de main en main
20 Chacier, voler, jouster et tournoier.
Ainsis rarons nostre vie premiere,
Et revendront les gens desheritéz
A leurs labours faire, de lie chiere,
Dances, chançons, festes et menestrelz,
25 Justice, loy raison et veritéz
Qui a chascun tendroit la droicte main.
Ainsi le vuet le prince souverain
Pour lequel doit moult le pueple proier,
Quant de guerre nous fait, par cas soudain,
30 Chacier, voler, jouster et tournoier.
L’envoy
Prince[3], en tous cas de la guerre me plain :
Veuilléz a paix vostre cuer avoier,
Tant que nulz homs n’ait des or en desdain
Chacer, voler, jouster et ournoier.
[1] Ms. arriere
[2] Ms. et avoir
[3] Ms. Princes