Balade 170 : O tu, cité tresnoble et ancienne (CLXXII)

Balade

                        O tu, cité tresnoble et ancienne,                                                         37d
                        Qui jadis fus fondee de Remus,
                        Reins t’appella, de ton[1] nom Rancienne.
                        Romme fonda ses freres Romulus.
5                      Le senat t’acousina
                        Quant Julius[2] Cesar ses osts mena
                        Pour conquerre Gaule, France nommee,
                        Et ton confort requist et demanda :
                        Tu dois estre sur toutes honouree.

10                    Car tu laissas premiers la loy paienne
                        Par saint Remy, qui de Laon fut dus,
                        Et te meis a la loy crestienne,
                        Quant tes princes nomméz Clodoveus
                        Adonc se crestienna,
15                    Par victoire[3] que Dieux a lui donna
                        Des ennemis estans en sa contree.
                        Et comme Dieux tel signe te monstra,
                        Tu doiz estre sur toutes honouree.

                        Lors delaissa toute loy arrienne
20                    Par Clothilde garnie de vertus.
                        En cellui temps estoit la cité sienne.
                        Ly premiers Roys crestiens fut veus :
                        Saint Remi le baptisa,
                        Et Saint Esprit[4] une empole apporta
25                    Des cieulx lassus, dont sa char fut sacree.
                        Et quant chascuns de ces Rois tel sacre a,
                        Tu dois estre sur toutes honouree.

[1] Saint Hilaire corrige en son

[2] Ms. Julles

[3] Ms. la victoire

[4] Ms. esperit