Balade 166 : Or sus, or sus, baillis et seneschaulx (CLXVII)

Autre Balade

                        Or sus, or sus, baillis et seneschaulx,
                        Prevost, viguiers, vicontes, lieutenans,
                        Et procureurs ! aléz cerchier les maulx,
                        Mettéz vous sus, conseilliers et sergens,
5                      Informéz vous des griefs de maintes gens
                        Qui ont ravi, efforcié et tollu,
                        Tué, murdri et encor ont voulu
                        Foy, justice, loy, droiture et raison
                        Perir de tout, qui n’y eust secouru :
10                    Prenéz, pandéz. Gibéz sont en saison.

                        Trop ont souffert les bons peine et travaulx
                        Par les mauvais, desordonnéz, puissans,
                        Qui le peuple ont fait manger a chevaulx,
                        Temples polluz, destruis les innocens,
15                    Et ont couru a milliers et a cens
                        Sanz droit, sanz loy et a glaive esmoulu.
                        Tous les crimes, que nul n’en a fallu,
                        Ont exercéz pluseurs en traison.
                        Tous ceuls donques qui n’en sont absolu
20                    Prenéz, pandéz. Gibéz sont en saison.

                        Nulz ne pourroit les pechiéz desloyaulx
                        Pugnir a droit es mauvais delinquens
                        Du temps passé qu’ilz ont fait aux loyaulx
                        Pour la guerre qu’ilz furent desirens :
25                    Or est pitié au pueple secourens
                        Qui veult la paix. Le traictié est venu,
                        Treves avons. Se pillart sont tenu,
                        Les bons vivront seigneur de leur maison.
                        A tous larrons sera mal advenu :
30                    Prenéz, pandéz. Gibéz sont en saison.