Balade 165 : S’onques servent durent plourer seigneur (CLXVI)

Balade

                        S’onques servent durent plourer seigneur,
                        Sa mort hair et regreter sa vie,
                        Faire souspirs de dolens yeulx, du cuer
                        Tristesce avoir, faire chiere esbahie,
5                      […]
                        Pour l’ame des trespasséz,
                        De ce faire ne soient ja lasséz
                        Les serviteurs du prince debonnaire,
                        Charles le Roy, qui leur donnoit asséz
10                    Car chascun d’eulx est tenu a ce faire.

                        Comment fut il ? Humble[1] et plain de douçour,
                        Devot vers Dieu et doulz vers sa maignie,
                        Saige en ses faiz, courtois et plains d’onour :
                        Chascuns devoit amer sa compaignie.
15                    Les bons amoit, il haioit villenie,
                        Il aaidoit aux oppresséz,
                        Et les sers Dieu furent de lui améz :
                        A son pouoir ne leur fist nul contraire.
                        D’iceulx pour lui soit Jhesus reclaméz,
20                    Car chascuns d’eulx est tenuz a ce faire.

                        Il a fondé maint lieu de grant valour,
                        Et secouru mainte povre abbaie,
                        Et a son temps a eu moult de dolour
                        Couvertement et par mauvaise envie.
25                    Le Boys fonda et le Vivier en Brie.
                        Saint Anthoine fut fondéz
                        Par lui, aussi furent remaisonnéz
                        Les Celestins, dont Dieux pité attraire                                               36d
                        Devroit vers lui. d’iceulx en soit priéz :
30                    Car chascun d’eulx est tenu a ce faire.

[1] Ms. humbles