Balade 164 : S’onques David ploura fort Absalon (CLXV)
Autre Balade
S’onques David ploura fort Absalon,
Ne Jonathas que les Phillistiens
Avec Saul mistrent mors en Hebron,
Ne se ploura Ecuba[1] les Troiens,
5 Donc doivent bien plourer les Crestiens
Le pappe Urbain, l’empereur et le Roy
Qui en brief temps sont trespasséz tuit troy,
Dont l’Eglise seuffre cruel dommaige.
Si font François jeunes et anciens
10 Par le trespas du roy Charles le Saige.
L’en le pouoit figurer Salemon,
Car moult soufrist tant d’autrui com des siens,
Et par son sens acrut sa region
Et a son temps amassa moult de biens.
15 Chasteaux fonda : or n’est ce monde riens
Quant de la mort nul espargner ne voy.
Et si n’est nul qui bien pense, ce croy,
Qu’au monde n’a nul parfait heritaige.
A tous le puis asséz monstrer au doy
20 Par le trespas du roy Charles le Saige.
Helas ! d’Urbain fut le regne tresbon
Crestienté tient[2] en ses drois liens.
Et l’empereur ot gracieux renom,
L’empire tint com fist Octoviens, 36c
25 Sanz nul debat. Mais comme chas et chiens
Tiennent aucun presentement la foy.
En grant doubte est regne, empire, et la loy,
Qui de ces trois ont touz perdu l’usaige.
Tailliéz sommes d’avoir asséz d’annoy
30 Par le trespas du roy Charles le Saige.
[1] Ms. Ecuba ploura
[2] Saint Hilaire corrige en tint
