Balade 163 : Lasse, lasse, chetive et esgaree (CLXIV)

Balade

                        Lasse, lasse, chetive et esgaree,
                        Povre d’amis, defaillant de seignour,
                        Qui jadis fu partout si renommee,
                        Riche d’avoir, franche et digne d’onnour,
5                      Qui au jour d’ui suy si plaine de plour,
                        Serve en tous cas et presque anientie,
                        Drois me deffault, sur moy regne rigour :
                        Que devandra la dolente esbahie ?

                        Je deusse estre comme vefve gardee
10                    Et cherie comme la douce flour
                        De ceuls de qui je suis emparentee
                        Qui deussent supporter ma dolour.
                        Car lors voit on et l’ami et l’amour
                        Quant li besoings queurt sur la seignourie                                        36b
15                    Secouréz moy, lasse ! ou je ne voy tour :
                        Que devendra la dolente esbahie ?

                        Vous qui m’avéz orpheline trouvee,
                        Meuve envers moy Pitié vostre douçour.
                        Que je soie saigement gouvernee,
20                    Sanz convoitier, afin que deshonour
                        N’aiéz en ce, et que grant et menour
                        Puissent veoir que vous m’avéz cherie.
                        Ou autrement, adieu sanz nul retour :
                        Que devendra la dolente esbahie ?