Balade 162 : Ne vous chaille de tendre a amasser (CLXIII)

Balade

                        Ne vous chaille de tendre a amasser,
                        Mais ne penséz qu’a mener bonne vie.
                        Qu’en amassant puet on son corps casser
                        Et acquerir courroux, merencolie,                                                       36a
5                      Dont venir puet crueuse maladie
                        Qui maintefois a l’ame et au corps nuit.
                        Qui a santé, pour Dieu, ne se soussie :
                        Telz a pou blef qui a asséz pain cuit.

                        Riches est cil qui puet partout aler,
10                    Qui d’autrui bien n’a nulle fois envie,
                        Et qui se scet saigement gouverner
                        Et maintenir en toute compaignie
                        Au gre de tous et sanz faire folie.
                        Qui en ouvrant prant ainsi son deduit,
15                    S’il lui souffist, ce proverbe n’oublie :
                        Telz a pou blef qui a asséz pain cuit.

                        A paines puet riches homs reposer
                        Ne bien avoir, tousjours merancolie,
                        De l’un avoir veult a l’autre tirer,
20                    Tousjours defrit, tousjours brait, toujours crie
                        Que povres est, et ne lui souffist mie :
                        Lors vient la mort en une seule nuit
                        Qui le destruit et a coup lui escrie :
                        Telz a pou blef qui a asséz pain cuit.