Balade 161 : Age de plomb, temps pervers, ciel d’arain (CLXII)

Autre Balade

                        Age de plomb, temps pervers, ciel d’arain,
                        Terre sanz fruit, [et] sterile et brehaingne,
                        Peuple maudit de [toute] doleur plain,
                        Il est bien drois que de vous tous me plaingne :
5                      Car je ne voy riens au monde qui viengne
                        Fors tristement et a confusion,
                        Et qui tous maulx en ses faiz ne compraingne,
                        Hui est li temps de tribulacion.

                        C’est par pechié, de ce soion certain
10                    Qui nous emfle plus que venin l’yraigne.
                        De Dieu servir sommes recuit et vain,
                        Et d’obeir a ce qu’il nous enseigne.
                        Et pour ce vient toute guerre mondaine,
                        Faulte de biens, mort persecucion
15                    Qui nous destruit, d’ajuder nous souviengne :
                        Hui est li temps de tribulacion.

                        Et si n’avons point d’ui ne de demain,
                        Qui li pechiéz et la mort ne nous praingne
                        En un moment et par un cas soudain,
20                    Et si n’est nul qui du mal se restraingne.
                        Or y pensons, car ja froitte est l’enseigne
                        Et li glaives de no pugnicion :
                        Crions mercy, qu’enfers ne nous souspraingne.
                        Hui est li temps de tribulacion.