Balade 160 : Qui est eureus et qui scet pratiquer (CLXI)

Balade

                        Qui est eureus et qui scet pratiquer,
                        Et de parler a belle rethorique,
                        Tant qu’avoir a, par beau rethoriquer,
                        Et enrichist par sa bonne pratique,
5                      Honouréz est plus que saint ne relique,
                        Des que l’on scet qu’il a deniers en cofre.
                        Mais qui riens n’a, chascun lui fait le nique :
                        Cui il meschiet, tous jours on lui mesofre.

                        Toudis verréz le povre homme moquer :
10                    Son sens n’est nul, car chascun li repplique.
                        Nulz ne se veult a son fait appliquer,
                        Car povreté au maleureus s’applique.
                        Eur et meseur est le gieu de la brique.
                        Qui est eureus chascun lui donne et offre,
15                    Mais maleureus est trop debouté, si que
                        Cui il meschiet, tousjours on lui mesoffre.

                        Dolent maleur, qui te fist evoquer ?
                        Quant de ton droit tu es merancolique,
                        Nulz ne te veult en hault lieu colloquer,
20                    Condicïon as de povre et d’ethique.                                                   35d
                        Et le riche est au monde collerique
                        A qui boneur a pieca fait son offre.
                        Pour Dieu, fui t’en, perilleux basilique :
                        Cui il meschiet, tous jours on lui mesoffre.