Balade 159 : Tant com j’ay eu Richesce avecques mi (CLX)

Autre Balade

                        Tant com j’ay eu Richesce avec[ques] mi
                        Et Fortune m’a esté bonne amie,
                        Se sont pluseurs appeléz mi ami
                        Offrans[1] pour moy a mettre corps et vie.
5                      Or s’est de moy Fortune departie,
                        Si m’ont laissié, et c’est chose commune,
                        Qui le sien pert, en lui tourne l’oye :
                        Au jour d’ui n’est ami que de Fortune.

                        Car tant qu’on a les biens avec[ques] lui
10                    Et les honeurs, un[2] chascun s’umilie.
                        Mais la personne est tost mise en oubli                                             35c
                        Quant li deffault estat et seignourie.
                        C’est povre amour qui est si tost perie,
                        Qui plus froide est que le ray de la lune :
15                    Qui saiges est ne s’y attende mie,
                        Au jour d’ui n’est ami que de Fortune.

                        Et quant chascun perçoit qu’il est ainsi,
                        Il doit doubter qu’il ne chiee en folie.
                        Garder le sien et qu’il ne croie aussi
20                    Les faulx amis, qu’aprés leur departie,
                        Se puist chevir afin qu’il ne mendie.
                        Car qui deschiet, de chascun et chascune[3]
                        Est mescongneu, ja l’espreuve en partie.
                        Au jour d’ui n’est ami que de Fortune.

[1] Ms. offerans

[2] Ms. une

[3] Ms. de chascune