Balade 158 : Povres d’amis, deffaillant de confort (CLIX)

Autre Balade

                        Povres[1] d’amis, deffaillant de confort,
                        Vefve au jour d’ui et dolente orpheline,
                        Pleine de plour et de tout desconfort[2],
                        Toute doleur envers moy s’achemine.
5                      Chascun me nuist, je suis cheue en ruine,
                        De tout perdre me voy en grant balance,
                        Quant il convient que ma gloire define,
                        Qui jadis fui la lumiere de France.

                        Je conquestay jadis maint riche fort
10                    Et mains pais[3] soubmis par ma doctrine,
                        Toutes terres doubtoient mon effort,
                        Je n’oy adonc ne voisin ne voisine
                        Qui ne me fust obedient, encline,
                        Et qui en tout ne doubtast ma puissance,
15                    Lasse ! et je voy que mon fait se decline
                        Qui jadis fui la lumiere de France.

                        Puis qu’ainsis est, venéz plourer ma mort,
                        Vaillance, Honeur et Pitiéz l’enterine !
                        De male heure furent sorti li sort
20                    Qu’avoir ne doy que le dos et l’eschine,
                        Par le sanglier, atout sa noire crine
                        Qui chascun jour en ma fourest se lance
                        Et me destruit par la queue vulpine.
                        Qui jadis fu la lumiere de France.

[1] Saint Hilaire corrige en Povre

[2] Ms. tous desconfors

[3] Ms. riches pais