Balade 157 : Dormi long temps ont en leur frommiere (CLVIII)

Autre Balade

                        Dormi long temps ont en leur frommiere
                        Sanz eulz mouvoir li froumi remuat
                        Pour le lyon qui dessus la pouldriere
                        Sanz eulx grever aloit seignouriant.
5                      Or a le lyon voulu
                        Que les fourmiz lui payassent treu,
                        Dont ilz se sont contre lui revelé.
                        De leur recept sont bien cent mille yssu :
                        Il estoit mort s’il ne s’en fust alé.

10                    Puis s’est retrait en clos d’une riviere,
                        Ou le secours de ses amis attent,
                        Car les froumiz ont levé leur banniere,
                        Fors abatuz et tué de sa gent.
                        S’il n’est briefment secouru,
15                    A ce qu’ilz ont en pluseurs lieux couru,
                        Estre pourra destruit et desolé.
                        Mais au besoing se doit monstrer vertu :
                        Il estoit mort s’il ne s’en fust alé.

                        Pour ce ne doit nulz avoir grant maniere
20                    Ne forcuider [1]que il soit trop puissant.
                        Ses amis doit aidier a lie chiere
                        Pour estre aidié quant il est indigent.
                        Car on a souvent veu
                        Que le petit a bien au grant neu.
25                    Par leur orgueil sont maint homme affolé.
                        Par le lyon est asséz parceu :
                        Il estoit mort s’il ne s’en fust alé.

[1] Ms. forcuideur