Balade 156 : O peuple ingrat par orgueil surmonté (CLVII)

Autre Balade

                        O peuple ingrat par orgueil surmonté
                        Qui veult laissier ton souverain seignour
                        Qui t’a mis hors de toute povreté
                        […][1]
5                      Et d’ordure soubhaucié en honour !
                        Et tu veulz par cas soudain
                        Lui deguerpir, dont rebelle te claim !
                        Advise toy, car, comment qu’il aviengne,
                        Sires sera, tu traveilles en vain :
10                    Reprouché yert ou pais de Bretaingne.

                        Dont pot venir si fole voulenté,
                        Ne qui pensa premier tel deshonour,
                        De commettre cas d’infidelité
                        Et de perdre de touz loyaulx l’amour ?
15                    Ce fut Pou Sens, Ignorance et Folour.
                        Et Desloyauté a plain
                        Et Convoitise ont bracié ce levain,
                        Si qu’a tousjours de ce forfait souviengne :
                        Pour effacier ton orgueil primerain
20                    Reprouché yert ou pays de Bretaingne.

                        Dieux het Orgueil, mainte foiz l’a dompté,
                        Pou vault Force qui n’a de Dieu cremour.
                        Radresce toy, recueuvre ta Bonté,
                        [Et] crie a Dieu mercy, ton creatour,                                                    35a
25                    Vien au bon Roy qui est plain de douçour
                        De cuer contrict et humain,
                        Com vray subject remet tout en sa main
                        En suppliant qu’en s’amour te reprangne,
                        Ou autrement saiches, et pour certain
30                    Reprouché yert ou pais de Bretaingne.

[1] Vers manquant non signalé ou vers non édité.