Balade 155 : Je me complaing de lingua dolosa (CLVI)

Autre Balade

                        Je me complaing[1] de lingua dolosa
                        Que comparer puis au chant de l’arronde,
                        En pluseurs lieux est moult vene[no]sa,
                        Elle honnist et affole le monde.
5                      D’envie bruit et de tristesse habonde :
                        Son ny a fait en mainte cheminee,
                        Mais en la fin convient que son ny fonde :
                        Elle est toudis de Raison condempnee.

                        En tous acors est insidiosa.
10                    Beaus semblant fait, sur fausseté se fonde.
                        Amer ne scet, ains est odiosa.
                        Qui trop la croit, il se plunge et affonde
                        En tel peril qu’il n’est ne mer ne onde
                        Qui plus grever puist creature nee.                                                    34d
15                    Maudicte soit, le vray Dieu la confunde !
                        Elle est toudis de Raison condempnee.

                        De touz maulx est le texte cum glosa,
                        Mains plaiz esmuet, de tous descors est bonde.
                        De Lymousin nasquit, capitosa,
20                    Qui maint assault fait sanz pierre et sanz fonde.
                        Elle nuist trop, mais au dernier[2] redunde
                        Tous maulx sur lui, sa cause est terminee.
                        Chascun la jet, pareil n’a ne seconde :
                        Elle est toudis de Raison condempnee.

[1] Ms. plainf

[2] Ms. derrenier