Balade 154 : Par .iiii. poins vient tribulacion (CLV)

Autre Balade

                        Par .iiii. poins vient tribulacion
                        A toutes gens en ceste mortel[1] vie,
                        Car pour leurs maulx se fait pugnicion
                        Quant obstinéz sont trop en leur folie.                                               34c
5                      Ou pour leur bien Dieu les tempte et chastie,
                        Pour pacience en leurs faiz eprouver,
                        Ou pour pugnir cilz qui les contrarie,
                        Pour les humbles devers lui ramener.

                        Car se l’omme a grant dominacion,
10                    Orgueil en soy, et point ne s’umilie,
                        Dieux het en lui son obstinacion
                        Et le pugnist, de ce ne doubtéz mie.
                        Et se trop a, son createur oublie,
                        Que[2] par tourment le veult lors rappeler.
15                    Et se bons sont, il les tempte et chastie
                        Pour les humbles devers lui ramener.

                        Et ceuls qui ont male condicion
                        Sanz advertir nul temps a leur folie,
                        Qui aux bons font toute sedicion,
20                    D’iceulx sera la malice pugnie.
                        Toutes telz gens Dieu en ce monde oublie
                        Car en enfer les fera tourmenter.
                        Ceuls qu’il aime bat de son escourgie,
                        Pour les humbles devers lui ramener.

[1] Ms. mortele

[2] Saint Hilaire corrige en Qui