Balade 153 : Comment pourroit princes bien gouverner (CLIV)

Autre Balade

                        Comment pourroit princes bien gouverner
                        Ne grant peuple tenir en union,
                        S’en soy meismes ne povoit rafrener
                        Les meurs mauvais de sa condicion ?
5                      Il ne pourroit nullement.
                        Car seignourir se doit premierement
                        Et corriger pour l’exemple d’autrui
                        Qui veult avoir commun gouvernement,
                        Si qu’on voie toute bonté en lui.

10                    Premier il doit Dieu et l’Eglise amer,
                        Humble cuer ait, pitié, compassion,
                        Le bien commun doit sur touz preferer,
                        Son peuple avoir en grant dilection,
                        Estre saige et diligent,
15                    Verité ait, tel doit estre regent,
                        Lent de pugnir, aux bons non fere ennuy,
                        Et aux mauvais rendre droit jugement,
                        Si qu’on voie toute bonté en lui.

                        D’entour lui doit touz menteurs rebouter,
20                    Justice avoir, Equité et Raison,
                        Le povre oir, le paintif escouter,
                        A touz venans avoir large maison,
                        Requerir crueusement
                        Son ennemi et mener doucement
25                    Ses vraiz subgiéz, sanz asservir nulli.
                        Avarice doit hair mortelment[1],
                        Si qu’on voie toute bonté en lui.

[1] Ms. mortelement