Balade 167 : Je puis asséz ethimologier (CLXVIII)

Autre Balade

                        Je puis asséz ethimologier
                        Le noble nom de la flour des François,
                        Par .vii. lettres, que l’en doit avoir chier,
                        Dont nomméz est Charles li jeunes roys :
5                      Le cpremier signifie courtois,
                        .H. hardi. .A. appert, et par R
                        Riches sur tous, reverens et adrois :
                        Or lui doint Dieux bien achever sa guerre !

                        Par .L. doit loiaulx encommencier,
10                    .E. le fera estable a toutes fois,
                        Et par .S. le puis saige jugier,
                        Pour maintenir son royaume et ses drois.
                        D’empereurs est, et de ceuls de Valois
                        Et de Bourbon, qui bien en scet enquerre,
15                    D’Anjou, Berry et Bourgoingne, ces trois :
                        Or lui doint Dieux bien achever sa guerre !

                        En .xiii^e. an vient a seignourier,
                        Et a garder son regne des Anglois,
                        Et si ami le veulent bien aidier,
20                    Vuidier fera le lieppart de son bois.
                        Force et pouoir puist avoir a son chois,
                        Tant qu’apaisier puist son pais et erre.
                        Prions en tuit, crions a haulte voix :
                        Or lui doint Dieux bien achever sa guerre !