Balade 151 : En treuve asséz en la saincte Escripture (CLII)

Balade

                        En treuve asséz en la saincte Escripture
                        Que ce monde prandra certaine fin,
                        Car terre et mer et toute creature
                        Et les sains cieuls qui de Dieu sont affin
5                      Arderont au Jugement.
                        Quant sera ce ? Ce sera vraiement
                        Quant on laira la foy de Jhesu Crist
                        Pour amasser joyaulx, or et argent :
                        Lors se fera le tresor d’Antecrist.

10                    Quele yert la loy ? C’iert la loy de nature
                        Ou chascun est a voulenté enclin,
                        En delaissant Raison, Foy et Droiture,
                        En ravissant les biens de son voisin.
                        Pressure sera de gent,
15                    Guerre es pais, de terre mouvement,
                        Lune et souleil seront souvent esclipst,
                        Chascun vouldra maisonner realment,
                        Lors se fera le tresor d’Antecrist.

                        Par tous ces poins nostre fins se figure
20                    Et li secles va du tout a declin.
                        Ne saint Pierre n’a plus sa nef en cure                                               34a
                        Giéz y regne, Simon ne veult qu’or fin.
                        Charité fault telement
                        Que sanz donner toutes graces il vent[1]
25                    Contre raison et le Saint Esperit.
                        Et puis qu’ainsi sera generalment,
                        Lors se fera le tresor d’Antecrist.

[1] Ms. toute grace vent