Balade 149 : Vous qui servéz a femme et a enfans (CL)

Balade            33c

                        Vous qui servéz a femme et [a] enfans
                        Aiéz Joseph toudis en remembrance.
                        Femmes servit tousjours tristes, dolans,
                        Et Jhesu Crist garda en son enfance.
5                      A pié trotoit, son fardel sur sa lance.
                        En pluseurs lieux est figuré ainsi,
                        Lez un mulet, pour leur faire plaisance,
                        Et si n’ot onq[1] feste en ce monde ci.

                        Quant Herode tua les Innocens,
10                    Pour oster Crist de celle pestillence,
                        Receu de Dieu les admonestemens.
                        Plus tost qu’il pot en Egipte s’avance,
                        Mere et enfant garda en grant doubtance
                        Li bon Joseph que ne fussent occi,
15                    En Bethleem rot[2] il moult de pesance
                        Et si n’ot onq[3] feste en ce monde ci.

                        Ainsi est il qui veult prandre le sens
                        Et de Joseph la vraie consequence,
                        Femme servir est pou d’avancemens
20                    Fors paine avoir et [trop] po de chevance.
                        Leur voulenté se mue en inconstance,
                        Mais des hommes sont servans remeri.
                        A Dieu Joseph qui tant ot de souffrance,
                        Et si n’ot onq[4] feste en ce monde ci.

[1] Ms. onques ; Saint Hilaire édite oncq

[2] Saint Hilaire édite r’ot

[3] Ms. onques ; Saint Hilaire édite oncq

[4] Ms. onques ; Saint Hilaire édite oncq