Balade 148 : Dampnéz soit il et esperdus (CXLIX)

Balade[1]

                        Dampnéz soit il et esperdus
                        Qui le corps Dieu despiecera,
                        Le desmembrer est deffendus
                        Pour Dieu qui se transfigura,
5                      Par le Dieu qui tous nous sauva,
                        Par cellui qui vous vivifia,
                        Par le Dieu ou chascun s’affie,
                        Par le Dieu qui fut circonci[2]
                        Fusmes nous sauvé et gari
10                    Par la mort dont Dieux vint a vie.

                        Trop est de sens foibles et nus,
                        Par la messe que Dieux chanta,
                        Par le Dieu qui mourut ça jus,
                        Qui sanz cause l’appellera.
15                    Par le Dieu qui se demonstra
                        A la Madgelaine s’amie,
                        Par les oeulx Dieu ne juréz mie :
                        Par Dieu qu’en Bethleem nasqui
                        Fust sauvéz ce qui est peri,
20                    Par la mort dont dieux vint a vie.

                        De l’eglise doit estre exclus
                        Cilz qui en vain son nom prandra,
                        Sa cervelle, face et piéz nus.
                        Gart soy qui Dieu blasphemera
25                    Ne qui son corps parjurera,
                        Car trop fait a Dieu villenie
                        Cilz qui le parjure et regnie,
                        De nouvele l’a mort et trahi,
                        Prins, accusé et envahi,
30                    Par la mort dont Dieux vint a vie.

[1] Même sujet et mêmes rimes que les précédentes

[2] Ms. circoncisi