Balade 147 : Las ! bien est li mondes confus (CXLVII)

Balade[1]

                        Las ! bien est li mondes confus,
                        Quant la teste Dieu jurera,
                        Et sa forcelle uns malostrus,
                        Et par les pas que Dieux passa,
5                      Par la sueur que Dieux sua,                                                                  33a
                        Par Dieu qui fut mort par envie,
                        Par cil dont la char fut traye,
                        Par le baptesme d’icellui
                        Fut le peuple d’enfer ravi,
10                    Par la mort dont Dieux vint a vie.

                        Telz jurans soient confundus
                        Et qui bien ne les pugnira !
                        Par Dieu qui est nostre salus
                        Par cellui qui resuscita,
15                    Par le Dieu qui ou ciel monta
                        Fut destruitte la monarchie
                        D’enfer, et la proie sa chie
                        Par cellui qui son corps offri,
                        Par Dieu qui le monde establi,
20                    Par la mort dont Dieux vint a vie.

                        Maleureus doit estre tenus
                        Qui de jurer ne se tendra.
                        Par Dieu qui pour nous fit batus,
                        Par le Dieu que l’en decracha,
25                    Par le Dieu qui nous rachata
                        Fut complette la prophecie,
                        Par la char que Dieux ot fichie,
                        Par la gueule Dieu autressi,
                        Par le glorieus crucifi,
30                    Par la mort dont Dieux vint a vie.

[1] Même sujet et mêmes rimes que la précédente